Пінская катэдра сабрала святароў на каляднае спатканне
30 снежня у Пінскай катэдральнай базыліцы Унебаўзяцця Найсвяцейшай Панны Марыі адбылася традыцыйная калядная сустрэча святароў, якія служаць у парафіях Пінскай дыяцэзіі. Спатканне пачалося супольнай Адарацыяй Найсвяцейшага Сакрамэнту ў капліцы душпастырскага цэнтра, дзе духоўныя і кансэкраваныя асобы ў малітве падзякавалі Богу за ўсе Яго ласкі ў адыходзячым юбілейным годзе і прасілі Нованароджанага Хрыста аб благаслаўленні на новы 2026 год.
Святую Імшу ў Пінскай катэдры з нагоды каляднай сустрэчы ўзначаліў Біскуп Пінскі Антоні Дзям’янка. Разам з ім літургію цэлебраваў Дапаможны Біскуп Пінскай дыяцэзіі Андрэй Зноска і біскуп эмерыт Казімір Велікаселец. На пачатку святой Імшы Біскуп Антоні прывітаў сабраных святароў, кансэкраваных асобаў і міністрантаў, якія ў гэтыя дні мелі сваю фармацыйную сустрэчу ў Пінскім пастаральным цэнтры. Іерарх заўважыў асаблівасць гэтага перыяду, калі Каталіцкі Касцёл святкуе восем дзён Актавы Божага Нараджэння як адзін вялікі ўрачысты дзень.
На заканчэнне літургіі святары павіншавалі Біскупа Антонія Дзям’янку са святамі Божага Нараджэння, а таксама з надыходзячым яго Днём нараджэння, які прыпадае на 1 студзеня. Сабраныя душпастыры і ўсе вернікі запэўнілі Біскупа Антонія ў пастаяннай малітоўнай падтрымцы, пажадалі Божага благаслаўлення, каб ён і надалей верна і рупліва кіраваў Божым Касцёлам на шырокіх прасторах Пінскай дыяцэзіі.
Сустрэча завяршылася традыцыйным узаемным дзяленнем аплаткам, святочнымі віншаваннямі і гасцінай у сценах душпастырскага цэнтра дыяцэзіі.
