Завяршэнне Юбілейнага года адзначылі ў Пінскай катэдры
28 снежня, у свята Найсвяцейшай Сям’і з Назарэта, ва ўсіх дыяцэзіях свету адбылося закрыццё Юбілейнага года. З гэтай нагоды таксама ў Пінскай катэдральнай базыліцы Унебаўзяцця Найсвяцейшай Панны Марыі адбыўся ўрачысты абрад завяршэння Святога Юбілею.
Святую Імшу ў Пінскай катэдры з нагоды ўрачыстасці ўзначаліў Біскуп Пінскі Антоні Дзям’янка. Іерарх прыгадаў вернікам пра вялікія і шматлікія Божыя ласкі, што былі дадзеныя ўсім нам як дар Божага Провіду ў адыходзячым Юбілейным годзе, у якім Пінская дыяцэзія святкавала сваю сотую гадавіную. Пастыр дыяцэзіі заахвоціў вернікаў узнесці да Бога малітву падзякі і папрасіць Яго благасласлаўлення на далейшы шлях руплівага хрысціянскага жыцця.
Святы Юбілейны год, завяршэнне якога на ўзроўні дыяцэзій абылося 28 снежня 2025 года, будзе закончаны Папам Львом XIV абрадам закрыцця святых адпустовых брамаў у базыліцы Святога Пятра ў Ватыкане ва ўрачыстасць Аб’яўлення Пана 6 студзеня 2026 года.
Фотарэпартаж з Пінска: Марына Валасар
