У Пінскай катэдры распачалося малітоўнае чуванне каля труны Біскупа Казіміра Велікасельца
11 лютага, ва ўспамін Маці Божай Люрдскай, у Пінскі катэдральны касцёл прыбыла з Гомеля труна з памерлым Біскупам Казімірам Велікасельцам.
Пасля яго смерці малітоўнае чуванне і жалобнае набажэнства спачатку адбылося ў Гомелі, у месцы апошняга служэння Біскупа Казіміра. Літургію у гомельскім касцёле Нараджэння Найсвяцейшай Панны Марыі 10 лютага ўзначаліў Пінскі Біскуп Антоні Дзям’янка, які памаліўся разам са святарамі і вернікамі Гомельшчыны.
11 лютага а 15.00, у гадзіну Божай Міласэрнасці, труна з целам памерлага Біскупа Казіміра была ўнесена ў катэдральны касцёл у Пінску. Малітоўную працэсію і жалобнае набажэнства з гэтай нагоды ўзначаліў Біскуп Антоні Дзям’янка. Разам з ім памаліліся святары і вернікі горада Пінска. Ціхае малітоўнае чуванне будзе адбывацца да 18.30, калі распачнецца набажэнства Нешпараў і жалобная святая Імша.