У Пружанах у 30-ты дзень пасля смерці памаліліся за спачылага Біскупа Казіміра Велікасельца
У 30-ты дзень пасля адыходу ў вечнасць святой памяці Біскупа Казіміра Велікасельца ОР адбылося памінальнае набажэнства ў Пружанах, на малой радзіме спачылага іерарха. Падобныя набажэнствы адбыліся таксама ў месцах шматгадовага служэння гэтага заслужанага пастыра: у Гомелі, Баранавічах і Пінску.
А 11.00 гадзіне ў касцёле Унебаўзяцця Найсвяцейшай Панны Марыі ў Пружанах распачалася адмысловая духоўная канферэнцыя, падчас якой святары і кансэкраваныя асобы падзяліліся сваімі ўспамінамі пра Біскупа Казіміра. У 11.30 распачалася Адарацыя Найсвяцейшага Сакрамэнту. У ціхай малітве сабраныя біскупы, святары, кансэкраваныя асобы і свецкія вернікі даручалі Божай Міласэрнасці спачылага пастыра.
Цэнтральным момантам гэтага дня стала святая Імша за памерлага іерарха. Літургію ўзначаліў Біскуп Пінскі Антоні Дзям’янка. Разам з ім Найсвяцейшую Эўхарыстыю цэлебраваў Біскуп Гродзенскі Уладзімір Гуляй, Дапаможны Біскуп Мінска-Магілёўскі Юрый Касабуцкі, Ардынарый Грэка-каталіцкай Царквы ў Беларусі Архімандрыт Сяргей Гаек, а таксама святары з розных рэгіёнаў краіны.
Гамілію да сабраных вернікаў прамовіў Біскуп Юрый Касабуцкі. Іерарх звярнуў увагу на тое, што спачылы Біскуп Казімір застаецца ў памяці шматлікіх людзей перадусім як чалавек малітвы. Усё яго жыццё было прасякнута няспыннай малітвай. Ён вучыўся гэтаму ад сваіх бацькоў з самага маленства, трываючы ў веры і дапамагаючы ім у цяжкай працы ў калгасе і пры хатняй гаспадарцы. Яго асаблівая малітоўная харызма ўмацоўвалася пазней разам са святарскім пакліканнем пры санктуарыі Маці Божай Міласэрнасці ў Вільні, а затым - у разнастайных месцах пастырскага служэння. Усюды ён ішоў з малітвай на вуснах і з бязмежным даверам да апекі Багародзіцы ў Яе цудоўных выявах: Вастрабрамскай, Баранавіцкай, Брэсцкай, Лагішынскай, Гомельскай.
Святая Імша завяршылася супольнай малітвай “Анёл Панскі” ў інтэнцыі святой памяці Біскупа Казіміра. Пасля заканчэння літургіі ўдзельнікі набажэнства наведалі магілу спачылага іерарха ў в. Шэрашава.