Пінская дыяцэзія
Рымска-каталіцкага Касцёла ў РБ

Пінская дыяцэзія

Рымска-каталіцкага Касцёла ў Рэспубліцы Беларусь

Кантакты
Ахвяраваць
Ru
en
Пінская дыяцэзія
Рымска-каталіцкага Касцёла ў Беларусі
КАНТАКТЫ
АХВЯРАВАЦЬ
Ru
en

Першая святая Камунія
ў Пінскай катэдры

У светлы сонечны дзень 18 мая парафія святых Апосталаў Пятра і Паўла ў Лагішыне заззяла асаблівым святлом, стаўшы сведкай незвычайнага моманту. Чатыры маленькія душы з адкрытымі, поўнымі веры сэрцамі, упершыню адчулі дотык Цела Хрыста. Першая Камунія - гэта не проста абрад, гэта першы, свядомы і чароўны крок насустрач Пану Езусу, які пад выглядам звыклага хлеба і віна таямніча прысутнічае сярод нас, а сонейка ззяла ў іх сэрцах, як адлюстраванне Божай ласкі.
У беласнежных убраннях, як анёлы, дзеці ў суправаджэнні бацькоў і родных увайшлі ў храм, упрыгожаны з асаблівай любоўю. Але найбольш чакання адчувалася ў маленькіх сэрцах, што з трымценнем чакалі сустрэчы з Езусам у выглядзе белай Гостыі.
Цэлебрацыя пачалася на вуліцы, дзе малітвы зліваліся з бацькоўскім благаслаўленнем. Потым дзеці, як адна вялікая сям'я, прайшлі ўрачыстай працэсіяй праз касцёл, набліжаючыся да алтара, каб разам праславіць Бога за неймаверны дар Эўхарыстыі.
Святая Камунія – гэта не проста сакрамант, гэта ключ да хрысціянскай сталасці, уваход у глыбіню духоўнага жыцця. Ксёндз Андрэй Шут, пробашч парафіі, у сваёй прамове падкрэсліў, што праз падрыхтоўку да сакрамантаў споведзі і Камуніі, дзеці засвоілі запаведзі і асновы Каталіцкай веры. Асновай, на якой будуецца наша хрысціянскае жыццё, з'яўляецца запаведзь Любові. Мы павінны навучыцца любіць бліжняга, як самога сябе, і нават мацней, як Езус Хрыстус, які аддаў сваё жыццё за нас на крыжы. Гэта прыклад бязмежнай, самаадданай любові. "Хто спажывае Маё Цела і п’е Маю Кроў, мае жыццё вечнае, і Я ўваскрашу яго ў апошні дзень» — кажа Пан. Бог жадае, каб мы прыходзілі да Яго, удзельнічалі ў Эўхарыстыі, спажывалі Яго Цела, а ў дар атрымлівалі жыццё вечнае. Эўхарыстыя – гэта найвялікшы Божы дар, і мы молімся, каб ён умацаваў нашых дзяцей і прынёс багатыя плады.

Трымаючы ў руках запаленыя свечкі, дзеці аднавілі свае абяцанні хросту, а літургія завяршылася ўзнёслымі малітвамі і ахвяраваннямі.

І вось настала доўгачаканая хвіліна Эўхарыстыі. Колькі шчырасці і хвалявання ў кожным укленчаным, хто з трапятаннем глядзіць на Хрыста, схаванага ў маленькай гостыі, і з поўным даверам "Амэн" прымае Яго ў сваё сэрца.

У завяршэнне Імшы бацькі выказалі шчырую падзяку святару за духоўную падрыхтоўку дзяцей да першай споведзі і Першай святой Камуніі, а таксама спадарыні Таццяне, катэхетцы, якая з любоўю на працягу двух гадоў знаёміла дзяцей з асновамі веры.

На памяць пра гэты дзень дзецям былі ўручаны памяткі аб Першай святой Камуніі, і ўсе разам зрабілі агульны фотаздымак.

Наперадзе ў дзяцей “белы тыдзень”, час, калі яны ў сваіх белых убраннях штодня наведваюць касцёл, дзякуючы за дар святой Камуніі. Як адзначыў ксёндз Андрэй Шут, урачыстасць Першай святой Камуніі для маленькіх вернікаў доўжыцца цэлую актаву, падкрэсліваючы важнасць гэтай падзеі ў жыцці кожнага з іх і ўсёй парафіяльнай супольнасці.


Тэкст падрыхтавала Таццяна Яфіменка 18.05.2025 г.