Пінская дыяцэзія
Рымска-каталіцкага Касцёла ў Рэспубліцы Беларусь
У свята Хрыста, Найвышэйшага Святара, у Пінску адбылася сустрэча духавенства
12 чэрвеня, калі Каталіцкі Касцёл адзначае свята Хрыста, Найвышэйшага і Вечнага Святара, у Пінскай катэдральнай базыліцы Унебаўзяцця Найсвяцейшай Панны Марыі прайшоў дзень засяроджання для духавенства і кансэкраваных асобаў з усёй дыяцэзіі.
Сустрэча пачалася з духоўнай канферэнцыі, падчас якой ксёндз доктар Ян Саламон, дэкан Ляхавіцкі і пробашч парафіі Адзведзінаў Найсвяцейшай Панны Марыі ў Ганцавічах, пазнаёміў сабраных з біяграфіяй і шляхам пастырскага служэння новаабранага Папы Льва XIV. Наступным пунктам праграмы стала ціхая малітва святароў падчас Адарацыі Найсвяцейшага Сакрамэнту – час асабістай размовы з Богам пра сваё пакліканне і служэнне.
Кульмінацыяй сустрэчы была святая Імша, якую ўзначаліў біскуп Пінскі Антоні Дзям’янка. Разам з ім Найсвяцейшую Эўхарыстыю цэлебраваў дапаможны біскуп Андрэй Зноска, біскуп эмерыт Казімір Велікаселец, архімандрыт Сяргей Гаек і святары, якія служаць у парафіях Пінскай дыяцэзіі. На распачацце літургіі Біскуп Андрэй звярнуў увагу сабраных на святочныя і малітоўныя нагоды гэтага дня: свята Хрыста, Найвышэйшага і Вечнага Святара як дзень асаблівай малітвы за нашых святароў і аб новых пакліканнях да гэтага служэння ў Касцёле, а таксама надыходзячы ўспамін святога Антонія – імяніны Біскупа Пінскага, калі жадаем асабліва маліцца аб шчодрых Божых ласках для пастыра дыяцэзіі.
На заканчэнне святой Імшы сабраныя біскупы, святары і свецкія вернікі павіншавалі біскупа Антонія Дзям’янку з надыходзячымі імянінамі, дзякуючы яму за ахвярнае пастырскае служэнне і жадаючы Божага благаслаўлення на далейшы шлях рэалізацыі біскупскага паклікання. Таксама словы віншаванняў былі скіраваныя біскупу Андрэю Зноску, які нядаўна адзначаў 20-ю гадавіну святарскіх пасвячэнняў, і ксяндзу каноніку Тадэвушу Альшэўскаму, пробашчу парафіі Маці Божай Валадаркі ў Брэсце, які 21 чэрвеня будзе дзякаваць Богу за 50 год свайго святарства. Біскуп Антоні падзякаваў сабраным за віншаванні і нагадаў пра святароў Пінскай дыяцэзіі, якія таксама носяць імя святога Антонія: гэта ксёндз прэлат Антоні Гэй, пробашч парафіі святога Юзафа ў Брэсце і ксёндз доктар Антоні Анціпенка, пробашч парафіі Узвышэння Святога Крыжа ў Брэсце.
Пасля заканчэння літургіі адбылася спецыяльная малітва біскупаў, святароў і парафіянаў на месцы пахавання Слугі Божага Біскупа Зыгмунта Лазінскага. Малітва была прымеркаваная да 155-ай гадавіны з даты яго нараджэння. Усе сабраныя маліліся аб хутчэйшай беатыфікацыі першага Біскупа Пінскага, а праз яго заступніцтва прасілі Бога аб дары шчодрых святарскіх пакліканняў з парафій дыяцэзіі.
Сабраныя на супольную малітву вернікі Пінска павіншавалі з днём нараджэння душпастыра Пінскай катэдральнай парафіі – ксяндза Паўла Врубеля, а таксама днём імянінаў – айца Ануфрыя Альховіка OSPPE, пробашча парафіі Спаслання Духа Святога ў Пінску. Карыстаючыся нагодай, прафіяне падзякавалі святарам за іх ахвярнае служэнне Богу і людзям.
Тэкст: кс. Андрэй Рылка;
Фота: Таццяна Яфіменка, кс. Чэслаў Ладыка
