Шляхам надзеі
да Каралевы Палесся
8 жніўня ў ціхім мястэчку Лагішын, што на Піншчыне, завяршылася 29-я пешая пілігрымка Баранавічы-Лагішын, якая адзначылася ў гэтым асаблівым Юбілейным Годзе Хрысціянства.
Пілігрымы вандравалі шляхам надзеі з Баранавіч да Цудатворнага абраза Маці Божай Лагішынскай — Каралевы Палесся.
Урачыстасці ў гонар цудадзейнай іконы Маці Божай Лагішынскай, Каралевы Палесся, набылі асаблівае значэнне ў Юбілейны год Касцёла і ў год, калі Пінская дыяцэзія адзначае 100-годдзе з моманту заснавання.
5 жніўня больш за 150 паломнікаў з Баранавіч, пад дэвізам "Шляхам надзеі крочым да Марыі", адправіліся ў шлях даўжынёю больш за 120 кіламетраў, каб аддаць пашану Багародзіцы ў дыяцэзіяльным санктуарыі. Узначаліў пілігрымку ксёндз Віталій Мяснікевіч. Духоўную падтрымку ў дарозе аказвалі ксяндзы Андрэй Рылка, Юрый Пракапюк, Вячаслаў Пялінак, Павел Врубель, Януш Чарнамораў, Айцец Леанард, а таксама сёстры-манахіні Вераніка і Наталля.
Чатыры дні, поўныя малітваў і разважанняў, сталі сапраўдным выпрабаваннем веры. Пілігрымы рознага ўзросту і прафесій, пераадольваючы стомленасць і цяжкасці дарогі, з кожным крокам набліжаліся да сваёй мэты. У Лагішыне іх сустракалі парафіяне на чале з пробашчам парафіі, ксяндзом Андрэем Шутом, шчодра адорваючы цеплынёй і гасціннасцю.
Сардэчна дзякуем усім удзельнікам гэтага духоўнага падарожжа: пілігрымам, святарам, сёстрам-манахіням і арганізатарам, хто сваёй працай і малітвай зрабіў гэтую падзею незабыўнай.
Запрашаем усіх жадаючых далучыцца да нас у наступнай пілігрымцы Баранавічы-Лагішын у 2026 годзе! Няхай вера і яднанне працягваюць натхняць нас на новыя духоўныя здзяйсненні.
Тэкст: Таццяна Ефіменка
Фота: Марына Валасар, Таццяна Ефіменка
