Вернікі Пінскай дыяцэзіі на Сусветных днях моладзі ў Рыме
Пілігрымка моладзі была прымеркавана да Юбілейнага года ў Паўсюдным Касцёле і Сусветнай сустрэчы моладзі, што зрабіла яе яшчэ больш значнай. Дадатковай нагодай было святкаванне стагоддзя з даты заснавання Пінскай дыяцэзіі. Вернікі юбілейнай дыяцэзіі адчувалі сябе сапраўднымі пілігрымамі надзеі, згодна з заклікам Святога Айца, каб данесці кожнаму чалавеку святло веры і хрысціянскага аптымізму.
Натхняльныя словы Папы Льва XIV, які суправаджаў сустрэчу моладзі і сумесныя малітвы, дапамагалі паломнікам усвядоміць важнасць надзеі ў жыцці чалавека. Яна як маяк у цемры, сіла, якая дазваляе нам рухацца наперад, нават калі бывае цяжка. Па словах удзельнікаў, сустрэча ў Рыме і сумесная малітва са Святым Айцом стала для іх сапраўдным духоўным імпульсам і напоўніла сэрцы непахіснай надзеяй.
Маладыя людзі адзначаюць, што менавіта ў Рыме – Апостальскай Сталіцы са шматлікімі хрысціянскімі святынямі - яны адчулі моц веры і блізкасць Бога, яшчэ раз усвядомілі, што з дапамогай Божай ласкі нават самыя вялікія жыццёвыя выклікі можна паспяхова пераадолець. Гэтае паломніцтва яшчэ раз паказала важнасць духоўнага развіцця і стала натхнненнем да новых здзяйсненняў у веры і надзеі.
Юбілейная пілігрымка моладзі Пінскай дыяцэзіі ў Рым дала магчымасць вернікам пераасэнсаваць сваё жыццё, знайсці новыя сэнсы і натхненне для будучыні. Маладыя паломнікі Пінскай дыяцэзіі вярнуліся дадому з багатым духоўным досведам і напоўненыя надзеяй, гатовыя дзяліцца святлом веры і хрысціянскім аптымізмам з кожным, каго Бог паставіць на іх жыцёвым шляху.
Фота удзельнікаў пілігрымкі
