У Мазыры адзначылі 30-ю гадавіну рэкансэкрацыі касцёла
28 верасня, у вігілію свята святых арханёлаў, у старадаўнім мазырскім касцёле Святога Арханёла Міхала адбылася ўрачыстасць прысвечаная 30-й гадавіне яго паўторнага асвячэння. Для вернікаў мазырскага рэгіёна гэтае святкаванне стала таксама асаблівым момантам супольнай малітвы і падзякі Пану Богу за сто гадоў Пінскай дыяцэзіі, часткай якой у 1991 г. стала таксама Мазыршчына.
Перад пачаткам літургіі ўсіх вернікаў і гасцей свята прывітаў пробашч парафіі ксёндз Павел Ярашэвіч. Святар падзякаваў за прысутнасць прадстаўнікам мясцовай дзяржаўнай улады, якія звярнуліся да сабраных з прывітальным адрасам ад імя кіраўніцтва Мазырскага райвыканкама.
Урачыстую святую Імшу ў гонар святога Арханёла Міхала – нябеснага заступніка мясцовай супольнасці вернікаў – узначаліў Біскуп Пінскі Антоні Дзям’янка. Святую Эўхарыстую цэлебраваў таксама Дапаможны Біскуп Пінскай дыяцэзіі Андрэй Зноска і Біскуп Эмерыт Казімір Велікаселец. Разам з біскупамі маліліся святары з парафій мазырскага дэканату і мясцовыя вернікі.
Святая Імша завяршылася малітоўнай працэсіяй і асвячэннем адноўленых бакавых алтароў старадаўняга касцёла прысвечаных святому Арханёлу Міхалу і святой Рыце.
Фота: Яна Вінакур
