Пілігрымы Пінскай дыяцэзіі сустрэліся са Святым Айцом
Львом XIV
Па благаслаўленні Біскупа Пінскага Антонія Дзям’янкі група вернікаў Пінскай дыяцэзіі вырушылі ў адпустовую пілігрымку да святыняў Апостальскай Сталіцы ў рамках святкавання Юбілейнага года ў Паўсюдным Касцёле і стагоддзя з даты заснавання Пінскай дыяцэзіі.
Пілігрымку ўзначаліў Дапаможны Біскуп Пінскай дыяцэзіі Андрэй Зноска. Цэнтральным момантам пілігрымкі стаў удзел вернікаў 1 кастрычніка ў Генеральнай аўдыенцыі са Святым Айцом Львом XIV на плошчы святога Пятра ў Ватыкане. Перад пачаткам спаткання прадстаўнік Святога Пасаду перад сабранымі сотнямі тысяч пілігрымаў з розных краін свету прывітаў паломнікаў з Пінскай дыяцэзіі, зазначыўшы, што яны прыбылі на малітву з Папам у сотую гадавіну сваёй дыяцэзіі. Пасля агульнай малітвы пілігрымаў са Святым Айцом адбылася непасрэдная сустрэча з Пантыфікам кіраўніка групы паломнікаў з юбілейнай Пінскай дыяцэзіі Біскупа Андрэя Зноскі. Іерарх папрасіў благаслаўлення Папы для ўсёй Пінскай дыяцэзіі і запэўніў, што ўсе вернікі нашага мясцовага Касцёла ахінаюць малітвай Яго Святасць. Знакам асаблівай увагі і пашаны Папы да вернікаў Пінскай дыяцэзіі стала прызначэнне яго Спецыяльнага Пасланніка кардынала Клаўдыё Гуджэроцці на галоўныя ўрачыстасці ў рамках святкавання сотай гадавіны Пінскай дыяцэзіі, якія адбудуцца 25 кастрычніка ў Пінску і 26 кастрычніка ў Брэсце.
Працягам юбілейнай пілігрымкі Пінскай дыяцэзіі стаў удзел вернікаў у святой Імшы ў базыліцы святога Пятра 2 кастрычніка, якую ўзначаліў Біскуп Андрэй Зноска. Таксама паломнікі з Піншчыны пад апекай духоўнага кіраўніка пілігрымкі ксяндза Паўла Рудзьмана і іншых святароў памоляцца ў вялікіх папскіх базыліках Рыма. На сваім шляху яны ўжо наведалі санктуарыі святога Антонія Падуанскага і святога Францішка Асізскага, молячыся да Бога аб шчодрым благаслаўленні для ўсёй супольнасці Пінскай дыяцэзіі з нагоды яе сотай гадавіны.
