Пінская дыяцэзія
Рымска-каталіцкага Касцёла ў РБ

Пінская дыяцэзія

Рымска-каталіцкага Касцёла ў Рэспубліцы Беларусь

Кантакты Ахвяраваць
Ru
en
Пінская дыяцэзія
Рымска-каталіцкага Касцёла ў Беларусі
КАНТАКТЫ АХВЯРАВАЦЬ
Ru
en

Апостальскі Нунцый
наведаў Гомель

Ужо амаль чатыры месяцы Арцыбіскуп Іньяцыа Чэфалія прадстаўляе ў Беларусі Святога Айца Льва XIV. За гэты час ён паспеў пазнаёміцца з рознымі каталіцкімі асяродкамі нашай краіны, а 7 кастрычніка здзейсніў свой першы візіт у Пінскую дыяцэзію.
Месцам пастырскага наведвання арцыбіскупа Іньяцыа Чэфалія стаў Дом міласэрнасці ў Гомелі, дзе з 1993 года ўсім патрабуючым служаць сёстры манаскай кангрэгацыі Місіянерак любові. Шырокай грамадскасці гэтыя манахіні больш вядомыя як сёстры Маці Тэрэзы. Менавіта святая Тэрэза Калькутская (†1997) заснавала першую супольнасць Місіянерак любові, якая акурат 7 кастрычніка 1950 года была зацверджана ў Калькуце (Індыя) на дыяцэзіяльным праве. Крыху пазней, у 1965 годзе, кангрэгацыя была зацверджана на пантыфікальным узроўні Апостальскім Пасадам. Такім чынам, сёлета споўнілася 75 гадоў з дня афіцыйнага пачатку дзейнасці сясцёр. У нашы дні яны ажыцяўляюць служэнне ў 139 краінах свету. У Беларусі ж адзіным месцам іх місіі з’яўляецца Гомель. Таму зусім не выпадкова Апостальскі Нунцый прыбыў у другі па велічыні горад Беларусі і самы ўсходні пункт Пінскай дыяцэзіі. Арцыбіскуп Іньяцыа Чэфалія разам з Біскупам Пінскім Антоніем Дзям’янкам, Біскупам эмэрытам Казімірам Велікасельцам, сакратаром нунцыятуры мансеньёрам Кшыштафам Сэрокам, ксяндзом канцлерам Андрэем Рылкам і святарамі Гомельскага дэканату дзякавалі Богу за дар служэння і харызмату сясцёр Маці Тэрэзы ў нашай краіне.

Святочны для сясцёр і мясцовага Касцёла дзень быў напоўнены разнастайнымі мерапрыемствамі: адбылася некалькігадзінная адарацыя Найсвяцейшага Сакрамэнту і паказ дакументальнага фільма абжыцці і дзейнасці святой Тэрэзы Калькутскай, а таксама арганізаваны абед для бедных. Кульмінацыяй дня стала Эўхарыстыя, у якой прынялі ўдзел гомельскія вернікі, валанцёры і, канечнеж, жыхары Дома. Біскуп Антоні Дзям’янка ўзначаліў урачыстую цэлебрацыю, а прадстаўнік СвятогаАйца прамовіў гамілію. Высокі госць падкрэсліў узнёсласць і велічнасць служэння сясцёр. Іерархзаўважыў, што іх сведчанне, як і сведчанне самой Маці Тэрэзы, з’яўляецца своеасаблівым выклікамдля сучаснага пакалення. Бо ў свеце, дзе каштоўнасць часта вымяраецца поспехам, яны нагадваюць, што сапраўднай каштоўнасцю не перастае быць бескарыслівая любоў.

На завяршэнне літургіі сёстры падзякавалі Апостальскаму Нунцыю, біскупам, святарам і ўсім вернікам за супольную малітву ў 75-ю гадавіну іх кангрэгацыі.

Пасля святой Імшы адбылася агапа для ўсіх удзельнікаў свята, падчас якой можна было не толькіпачаставацца, але і правесці час у братэрскай атмасферы з супольнасцю Дома міласэрнасці.

На наступны дзень 8 кастрычніка Арцыбіскуп Іньяцыа Чэфалія наведаў гомельскую юбілейную святыню – касцёл Нараджэння Найсвяцейшай Панны Марыі, таксама пазнаёміўся з ходам будаўніцтва касцёла ў адроджанай парафіі Унебаўзяцця Найсвяцейшай Панны Марыі. У сваю чаргу дырэктар мясцовай дабрачыннай каталіцкай місіі “Карытас” айцец Леанарад Адушкевіч OSPPE пазнаёміў іерарха з харытатыўнай дзейнасцю Каталіцкага Касцёла ў рэгіёне. Яскравым прыкладам рэалізацыі гэтай хрысціянскай місіі з’яўляецца Цэнтр для дзяцей з асаблівасцямі развіцця ў Гомелі. Гэты ўнікальны асяродак стаў таксама добрым прыкладам сумеснага клопату пра патрабуючых з боку Касцёла, дзяржавы, грамадскіх арганізацый і шматлікіх людзей добрай волі.