У Брэсце Пасланнік Папы ўзначаліў Юбілей моладзі
26 кастрычніка ў касцёле Узвышэння Святога Крыжа ў Брэсце адбылося дыяцэзіяльнае спатканне моладзі з нагоды Юбілейнага года ў Паўсюдным Касцёле і стагоддзя з даты заснавання Пінскай дыяцэзіі. Асаблівым госцем Юбілею моладзі стаў Пасланнік Папы на ўрачыстае святкаванне сотай гадавіны дыяцэзіі Кардынал Клаўдыё Гуджэроцці, Прэфект Дыкастэрыі па справах Усходніх Касцёлаў у Ватыкане.
Цэнтральнае святкаванне стагоддзя Пінскай дыяцэзіі распачалося 25 кастрычніка ў Пінску. Сустрэча моладзі ў Брэсце стала працягам гэтай урачыстасці. Амаль паўтысячы маладых людзей з розных парафій не толькі Пінскай дыяцэзіі, але і суседніх дыяцэзій сабраліся ў старадаўнім горадзе на Бугу, каб у супольнай малітве падзякаваць Добраму Богу за вялікую гістарычную спадчыну мінулых стагоддзяў Касцёла на беларускай зямлі, а таксама прасіць Божага благаслаўлення на будучыню.
Юбілей моладзі распачаўся з прэзентацыі груп з розных рэгіёнаў, дзе кожны падрыхтаваў нейкі асаблівы спосаб прывітання і знаёмства з іншымі.
Найбольш хвалюючым момантам для ўсіх стала прыбыццё на сустрэчу Кардынала Клаўдыё Гуджэроцці - Спецыяльнага Пасланніка Яго Святасці Папы Льва XIV. На парозе святыні Яго Эмінэнцыю прывітаў Біскуп Пінскай дыяцэзіі Антоні Дзям’янка, прадстаўнікі Брэсцкага аблвыканкама і старшыня Брэсцкага гарадскога выканаўчага камітэта С. Н. Лабадзінскі. Моладзь Пінскай дыяцэзіі і вернікі Брэста віталі Кардынала традыцыйным беларускім хлебам-соллю, а таксама папрасілі паблагаславіць адмысловы, зроблены мясцовымі майстрамі, юбілейны моладзевы крыж – сімвал Сусветных сустрэч каталіцкай моладзі.
Вельмі цікавым, змястоўным і адначасова задумлівым момантам спаткання стаў дыялог моладзі з Пасланнікам Папы. Кардынал Гуджэроцці заахвоціў юнакоў і дзяўчат цаніць тое, што яны атрымліваюць ад Бога – свае таленты, здольнасці, спадчыну веры і хрысціняскіх каштоўнасцей, якія ім перадало старэйшае пакаленне. Не забываць, што кожны чалавек – гэта бясцэннае дзіця Пана, годнае любові, пашаны і клопату. Эмінэнцыя запрасіў моладзь не толькі распазнаваць у сабе Божыя дары, але і ўмець дзяліцца імі, дзяліцца радасцю хрысціянскай веры, Добрай Навіны аб збаўленні і пакліканні кожнага чалавека да Нябеснага Валадарства.
Працягам сустрэчы стала святая Імша, якую ўзначаліў Пасланнік Папы. Разам з ім святую Эўхарыстыю цэлебраваў Апостальскі Нунцый у Беларусі Арцыбіскуп Іньяцыа Чэфаліа, а таксама біскупы з розных дыяцэзій Беларусі. Падчас гаміліі Кардынал Клаўдыё заахвоціў вернікаў цаніць тыя найлепшыя рысы характару, якімі беларусы павінны ганарыцца і ў чым з’яўляюцца прыкладам для іншых народаў свету: дабразычлівасць, мудрасць, уменне прыносіць мір і ўзаемаразуменне. Папскі Пасланнік нагадаў, што Касцёл на нашай зямлі мае больш чым тысячагадовую гісторыю і настолькі багатую духоўную спадчыну веры, якую неабходна раскрываць, на якой трэба вучыцца і якая з’яўляецца прыкладам для ўсяго свету.
На завяршэнне літургіі Біскуп Антоні Дзям’янка выказаў словы ўдзячнасці Пасланніку Папы, што той наведаў юбіленае спатканне моладзі і прывёз ёй благаслаўленне ад Пантыфіка. Таксама пастыр Пінскай дыяцэзіі падзякаваў ксяндзу Паўлу Рудзьману – дыяцэзіяльнаму душпастыру моладзі і ўсім аніматарам, якія на высокім узроўні арганізавалі правядзенне гэтай сустрэчы.
Наступнай часткай Юбілею моладзі былі спецыяльныя майстар-класы, дзе з дапамогай аніматараў усе жадаючыя маглі яшчэ больш раскрыць свае таленты і навучыцца імі карыстацца.
На завяршэнне спаткання, перад тым як моладзь яшчэ раз сабралася на супольную малітву падзякі ў касцёле, да іх далучыўся Папскі Пасланнік і беларускія біскупы, што дало магчымасць маладым людзям у братэрскай атмасферы непасрэдна сустрэцца з вялікім госцем і пастырамі мясцовага Касцёла, каб з імі асабіста паразмаўляць і атрымаць благаслаўленне.
Фота - Аляксандра Шчаглінская
