Кардынал Гуджэроцці ўзначаліў святкаванне юбілею
Пінскай дыяцэзіі
25 лістапада у Баранавічах у мікрараёне Тэкстыльны адбылася ўрачыстасць пасвячэння новазбудаванага касцёла Божай Міласэрнасці. Літургію з гэтай нагоды ўзначаліў Біскуп Пінскі Антоні Дзям’янка.
Вітаючы шматлікіх вернікаў, сабраных на святую Імшу пасвячэння, пастыр Пінскай дыяцэзіі заўважыў, што ў гэтай частцы горада калісьці была капліца, але яна не перажыла часы атэізма. Таму новазбудаваны касцёл стаў фактычна адраджэннем былой святыні.
Гамілію падчас урачыстай святой Імшы прамовіў ксёндз Павел Мазан, пробашч парафіі святога Юзафа ў Ляхавічах. Святар узгадаў розныя моманты з гісторыі пабудовы святыні, сведкам і ўдзельнікам якіх быў ён сам. Таксама ён заўважыў як важную ролю адыгрывае святыня ў жыцці вернікаў, якія ў ёй могуць атрымліваць асаблівыя Божыя ласкі праз прыняцце святых сакрамэнтаў.
На заканчэнне літургіі пасвячэння святыні і велічнага алтара, са словамі падзякі да Біскупа Антонія Дзям’янкі, святароў, ахвярадаўцаў і шматлікіх вернікаў, якія ўдзельнічалі ў справе пабудовы святыні, звярнуўся пробашч парафіі Божай Міласэрнасці ксёндз Павел Рудзьман. Узгадваючы шматлікіх асобаў і парафіі, якія дапамагалі ў справе пабудовы касцёла, святар адзначыў, што гэтае будаўніцтва аб’яднала і згуртавала мясцовую парафію ў адзіную моцную Божую сям’ю.
Біскуп Антоні Дзям’янка, удзяляючы благаслаўленне ўсім сабраным вернікам, запрасіў іх рупліва маліцца аб пакліканнях да святарскага служэння, каб кожная парафіяльная супольнасць дыяцэзіі мела свайго пастаяннага душпастыра і магла часта карыстацца Божым дарам святых сакрамэнтаў.
Фота - Святлана Лабковіч
