“Надзея не расчаруе”. Адкрыта рэгістрацыя на сёлетнюю Музычную майстэрню ў Івянцы

З 21 па 27 ліпеня 2025 года ў Івянцы пройдзе 21-я Музычная майстэрня – штогадовая малітоўна-фармацыйная сустрэча аматараў хрысціянскай музыкі, якія хочуць паглыбіць стасункі з Богам і ўдасканаліць свае музычныя ўменні.

Музычная майстэрня праводзіцца ў Івянцы з 2003 года дзякуючы ініцыятыве і гасціннасці супольнасці айцоў-францішканаў з мясцовага кляштара св. Антонія Падуанскага. Аб’ядноўваючы аматараў і прафесіяналаў рознага ўзросту і з розных куткоў Беларусі, яна заўсёды прапануе насычаную праграму музычных заняткаў, а таксама прастору для супольнай і асабістай малітвы і духоўныя практыкаванні. Пра Музычную майстэрню мінулых гадоў рэгулярна паведамляў партал сatholic.by (напрыклад, 2018, 2022, 2024).

Дэвізам сёлетняй музычнай сустрэчы ў Івянцы стануць словы святога Паўла “Надзея не расчаруе” (пар. Рым 5, 5), сугучныя з тэмай Юбілейнага года надзеі. Хто, як не музыканты, якія крочаць за Даўцам надзеі, зможа больш прыгожа і шчыра засведчыць пра Яго? Далучайцеся, каб даведацца!

Уласна музычная праграма Музычнай майстэрні 2025 прадугледжвае заняткі па літургічным спеве ў хоры, майстар-класы на выбар (хор праслаўлення, фартэпіяна, гітара, бас-гітара, перкусія, аркестр, тэатр, сцэнаграфія, кантарскі майстар-клас), а таксама традыцыйныя джазавыя вечары.

Зарэгістравацца да ўдзелу ў сёлетняй Музычнай майстэрні можна па СПАСЫЛЦЫ.

Запрашаем сачыць за навінамі майстэрні ў сацыяльных сетках: Instagram, Telegram.

Плёны Музычнай майстэрні ўсе жадаючыя змогуць пачуць падчас святых Імшаў у суботу 26 ліпеня (17:00) і ў нядзелю 27 ліпеня (11:00), а таксама падчас фінальнай малітвы праслаўлення, якая адбудзецца ў суботу 26 ліпеня ў 20:15.

УМОВЫ ЎДЗЕЛУ

Кошт удзелу – 70 рублёў (для валанцёраў – 50 рублёў). У кошт уваходзяць пакет удзельніка і штодзённае трохразовае харчаванне.

Удзельнічаць могуць асобы ад 14 гадоў. Непаўналетнім асобам неабходна прадставіць пісьмовы дазвол ад бацькоў (узор размешчаны ў форме рэгістрацыі) і мець пастаянна прысутнага на майстэрні паўналетняга апекуна. Калі хаця б адна з умоў не бузе выканана, асоба да ўдзелу дапушчана не будзе!

Пражыванне арганізавана ў намётавым гарадку, таму неабходна ўзяць спальнік і карымат, а таксама, па магчымасці, мець пры сабе намёт.

Калі Вы плануеце прымаць удзел у адным з інструментальных майстар-класаў, то захапіце з сабой свой інструмент (электрагітарыстам варта мець свой комбік).

Рэгістрацыя на месцы распачнецца ў панядзелак 21 ліпеня ў 16:30. Першы пункт афіцыйнай праграмы – падрыхтоўка да святой Імшы ў 17:30.

Вечар аўторка будзе прысвечаны знаёмству ўсіх удзельнікаў, таму можна падрыхтаваць нейкі нумар, спеў або некалькі слоў, каб прадставіцца самому або прадставіць сваю парафію. У сераду адбудзецца вечар талентаў, дзе кожны ахвочы зможа праявіць свае творчыя здольнасці на вялікай сцэне.