НАВІНЫ ПІНСКАЙ ДЫЯЦЭЗІІ

У Пінскай катэдры адбылася ўрачыстасць Першай Святой Камуніі

25 мая стаў асаблівым днём для дзяцей катэдральнай парафіі Унебаўзяцця Найсвяцейшай Панны Марыі ў Пінску. Сёння іх сэрцы напоўнены трэпетным чаканнем, бо пасля двух гадоў падрыхтоўкі, падрабязнага знаёмства з верай, яны ўпершыню прыступілі да сакрамэнту пакаяння і прымуць Хрыста ў Святой Камуніі.

Святая Імша пачалася з асаблівага благаслаўлення бацькамі сваіх дзяцей, каб адгэтуль яны маглі яшчэ больш годна ўдзельнічаць у Эўхарыстыі. Потым, у суправаджэнні літургічнай службы і ўрачыстых спеваў, яны ўвайшлі ў святыню.

На пачатку святочнай Імшы пробашч заклікаў усіх маліцца за дзяцей, просячы ў Бога ласку, каб яны заўсёды заставаліся ў любові Хрыста.

Падчас гаміліі ксёндз Павел звярнуўся да дзяцей з такімі словамі:
Дарагія дзеці! Сёння сапраўды незвычайны дзень! Вы ўпершыню прымеце Цела Езуса Хрыста праз святую Камунію. Уявіце сабе, Хрыстос сам прыйдзе да вас, у вашыя сэрцы! Гэта як абяцанне, што Ён заўсёды будзе побач з вамі, а вы з Ім.
Прыняць Хрыста – гэта вялікі дар, і Ён сам сказаў: "Я хлеб жывы, які з неба сышоў; хто будзе есьці хлеб гэты, жыць будзе вечна" (Ян 6:51). Але Ісус хоча, каб мы не толькі прымалі Яго, але і слухаліся Яго. Ён заўсёды слухаўся свайго Айца, Бога, і сказаў: "Калі любіце Мяне, захоўвайце запаведзі Мае" (Ян 14:15).
Калі мы любім Хрыста, мы павінны старацца рабіць тое, чаму Ён нас вучыць: быць добрымі, дапамагаць іншым, нікога не крыўдзіць. Бо як напісана: "Хто мае запаведзі Мае і захоўвае іх, той любіць Мяне" (Ян 14:21).
Памятайце, быць хрысціянінам – гэта не толькі прыняць камунію, але і імкнуцца жыць так, як вучыў Хрыстос. Калі мы будзем старацца быць добрымі і слухацца Бога, наша любоў да Хрыста будзе сапраўднай! Не проста казаць, што мы Яго любім, а паказваць гэта сваімі ўчынкамі.
Калі мы робім тое, што добрае, як вучыў Хрыстос, мы паказваем Яму сваю любоў. Таму будзьце добрымі сябрамі, слухайцеся бацькоў і настаўнікаў, дапамагайце тым, хто мае патрэбу, і тады ваша жыццё стане сапраўдным сведчаннем вашай любові да Бога.
Пасля вызнання веры дзеці разам з бацькамі са шчырасцю ў сэрцы звярнуліся да Бога ў малітве верных, а таксама склалі дары, як сімвалы веры, любові, удзячнасці.

І вось наблізіўся доўгачаканы момант - першая сустрэча з Езусам у сакрамэнце Эўхарыстыі, праз якую 10 хлопчыкаў і дзяўчынак далучыліся да таямніцы Бога і сталі ўдзельнікамі вечнага жыцця.

На заканчэнне Імшы бацькі выказалі словы ўдзячнасці Біскупу Антонію, ксяндзу Паўлу, і асабліва падкрэслілі працу катэхеткі спадарыні Таццяны, якая з любоўю і прафесіяналізмам падрыхтавала маладых вернікаў да гэтага важнага этапу ў іх духоўным жыцці. Яны падзякавалі ўсім, хто дапамог падрыхтаваць гэтае ўрачыстае святкаванне.
2025-05-25 21:00 Падзеі ў Дыяцэзіі Біскуп Пінскі