22 мая Апостальскі Нунцый у Беларусі прыняў біскупскае пасвячэнне

22 мая ў базыліцы святога Пятра ў Ватыкане Арцыбіскуп намінант Іньяцыё Чэффаліа прыняў біскупскае пасвячэнне з рук Яго Эмінэнцыі Кардынала П’етро Параліна, дзяржаўнага сакратара Апостальскай Сталіцы.

25 сакавіка ва ўрачыстасць Звеставання Найсвяцейшай Панны Марыі Папа Францішак прызначыў Яго Эксцэленцыю Іньяцыё Чэффаліа новым Апостальскім Нунцыем у Беларусі пасля заканчэння місіі ў нашай краіне яго папярэдніка – Арцыбіскупа Антэ Ёзіча.

Арцыбіскуп Іньяцыё Чэффаліа (Ignazio Ceffalia) нарадзіўся 28 красавіка 1975 года ў горадзе Палерма ў Італіі. Атрымаў святарскае пасвячэнне 6 жніўня 2003 года. Інкардынаваны ў дыяцэзію П’яна-дэльі-Альбанезі. З’яўляецца доктарам кананічнага права. Распачаў дыпламатычную службу ў Апостальскай Сталіцы 1 ліпеня 2006 года. Працаваў у Эквадоры, Тайландзе, Пастаянным Прадстаўніцтве Апостальскай Сталіцы пры Савеце Еўропы (Страсбург), у Секцыі Адносін з Дзяржавамі Дзяржаўнага Сакратарыята Апостальскай Сталіцы і да апошняга часу ў Венесуэле. Валодае італьянскай, албанскай, французскай, англійскай, іспанскай мовамі.

Супольнасць духавенства, кансэкраваных асобаў і свецкіх вернікаў Пінскай дыяцэзіі лучыцца ў малітве аб Божым благаслаўленні для Арцыбіскупа Іньяцыё Чэффаліа на шляху рэалізацыі яго служэння як Апостальскага Нунцыя - прадстаўніка Святога Айца Льва XIV ў Беларусі.