14-16 сакавіка біскуп Андрэй Зноска праводзіў парафіяльныя рэкалекцыі ў паўночнай сталіцы Беларусі, горадзе атамшчыкаў, і як яшчэ толькі не называюць старажытны Астравец.
На працягу трох дзён вернікі Парафіі Узвышэння Святога Крыжа разам з іерархам з Пінска разважалі над навяртаннем сэрца і трываннем пры Богу. Нядаўна гэта парафія развіталася са сваім заўчасна спачылым пробашчам - кс. Андрэем Горбачам, але пачатыя ім добрыя справы працягвае і развівае кс. Юры Кузьміч, аднакурснік біскупа Андрэя. Падчас рэкалекцый малады іерарх праводзіў набажэнства Крыжовага шляху, сустракаўся з малітоўным групамі, асаблівую ўвагу прысвяціў заняткам з малодшымі парафіянамі. Знаходзячыся ў Астраўцы, біскуп Андрэй наведаў таксама супольнасць Сясцёр Эўхарыстак, адна з якіх, сястра Марына, служыць у Парафіі Святога Крыжа. Развітваючыся з вернікамі перад вяртаннем у Пінск, іерарх служыў Святую Імшу за ўсю Парафію, у таварыстве пробашча, кс. Юрыя, і другога аднакурсніка, ксяндза каноніка Антонія Казлоўскага з Вішнева, Смаргонскага дэкана.
