У 2019 г., пасля заканчэння асноўных рамонтных прац на Пінскім катэдральным аргане, быў праведзены першы буйны міжнародны фестываль арганнай музыкі адмыслова прысвечаны памяці кардынала Казіміра Свёнтэка, які яшчэ ў 1980-я гады пасля заканчэння папярэдняга рамонта аргана арганізоўваў арганныя канцэрты ў Пінскай катэдры.
Першы міжнародны фестываль арганнай музыкі ў 2019 г. складаўся з 29 канцэртаў. Удзел у фестывалі прынялі сотні аматараў класічнай музыкі. Фестываль сабраў больш за 5 тыс. аматараў музыкі. Арганізатарамі фестывалю ў 2019 г. і ў наступныя гады сталі Пінская дыяцэзія і Пінскі гарвыканкам.
У тым жа годзе з 13 па 20 кастрычніка ў межах фестывалю ў Пінскай катэдры адбыўся буйны міжнародны музычны сімпозіум і майстар-клас прысвечаны арганнай музыцы.
Пад натхненнем фестывалю быў зняты фільм пра Пінскі арган пад назвай “Арган над Пінай” (кінарэжысёр Вольга Плясневіч). Перад гэтым пра пінскі арган быў вядомы толькі аддзін фільм "Арганы Беларусі - Краявіды жыцця і смерці" зняты ў 1995 г.
У 2021 г. у Пінскай катэдры адбыўся музычны арганны сімпозіум.
У 2022 г., пасля некаторага перапынку звязанага з пандэміяй, з 18 чэрвеня па 18 верасня адбыўся чарговы фестываль арганнай музыкі пад новай назвай: “Ars Magna Organi” (“Вялікае мастацтва аргана”), якая замацавалася за гэтым фестывалем. У 2022 г. ў межах фестывалю адбылося 51 канцэрт на 11 пляцоўках. У Пінску як цэнтры фестывалю прайшлі 17 буйных канцэртаў з удзелам 14 арганістаў з розных краін.
У 2023 г. з 24 чэрвеня па 17 верасня адбыўся чарговы сезон фестывалю "Ars Magna Organi". У межах праграмы адбыліся 33 канцэрты на 3 пляцоўках. 23 канцрэты адбыліся ў Пінскай катэдры. На фестывалі выступілі 13 арганістаў, 3 камерных калектывы, 2 студэнцкія арганныя класы.
Асаблівай падзеяй гэтага фестывалю стаў паказ нямога фільма пра жыццё святога Францішка Асізскага “Frate Sole” (1918 г.) з агучваннем пры дапамозе арганнай імправізацыі.
У 2024 г. чаровы сезон міжнароднага фестывалю "Ars Magna Organi" працягваўся з 8 чэрвеня па 13 кастрычніка. У праграме фестывалю адбылося 56 канцэртаў на 5 пляцоўках (арганы ў Пінску, Іванаве, Мядзведзічах, Навагрудку і Ружанах). Цэнтрам фестывалю традыцыйна былі канцэрты на непаўторным пінскім аргане, які няспынна збірае многія сотні слухачоў і шматлікіх майстраў музыкі з розных краін свету.
З 22 чэрвеня па 3 ліпеня ў межах фестывалю адбылася вялікая “Арганная акадэмія” для студэнтаў арганнага мастацтва.
На завяршэнне фестывалю шматлікія госці і ўдзельнікі адзначылі, што горад Пінск не толькі ў Беларусі, але і ў замежжы стаў успрымацца як сталіца арганнай музыкі. А Пінскі катэдральны арган стаў сапраўдным турыстычным брэндам горада.