Пінская дыяцэзія
Рымска-каталіцкага Касцёла ў Рэспубліцы Беларусь
Кангрэгацыя Місіянераў
святога Вінцэнта дэ Поля
(лазарысты) (CM)
Манаская кангрэгацыя місіянераў была створаная святым Вінцэнтам дэ Полем (1581 – 1660 гг.). Гэты франузскі святар, перажыўшы цяжкія выправабаванні, прысягнуў да канца свайго жыцця служыць бедным. Спачатку ён арганізаваў Брацтва міласэрнасці — супольнасць свецкіх сясцёр. Пазней заснаваў мужчынскае таварыства служыцеляў бедных. А ў 1625 г. — манаскую супольнасць Місій, заданнем якой стала падрыхтоўка місій і клопат пра выхаванне духавенства.
Паколькі сядзіба супольнасці Місій знаходзілася побач з парыжскім касцёлам святога Лазара, законнікаў пачалі называць лазарыстамі. Адданы святар, служыцель бедных, апякун сіротаў і хворых арганізоўваў сталоўкі для простага народу, а таксама палявыя шпіталі (лазарэты) падчас крывавых паўстанняў супраць каралеўскай улады, што адбываліся ў краіне ў сярэдзіне XVII ст. На момант яго смерці 27 верасня 1660 г. у Францыі існавала ўжо каля 800 місій лазарыстаў, якія пазней распаўсюдзіліся па ўсім свеце.
Айцы місіянеры прысвячаюць сябе працы на карысць убогіх. Ад пачатку існавання кангрэгацыі яны падарожнічалі ад вёскі да вёскі і прамаўлялі казанні, катэхізавалі і заахвочвалі да шчырай споведзі з усяго жыцця. Акрамя таго, іх задачаю з’яўляецца належная фармацыя добрых святароў.
На тэрыторыі Пінскай дыяцэзіі кангрэгацыя місіянераў святога Вінцэнта дэ Поля дзейнічае з XVIII ст. На сённяшні дзень айцы гэтай манаскай супольнасці служаць вернікам у парафіях у Ружанах, Шарашове, Лыскаве і Перадзельску на Пружаншчыне.
Выкарыстаны матэрыялы: Catholic.by, „Ave Maria”